Motorsiklo nagsungag 1 patay, 3 angol

Usa ang patay ug tulo ang angol  nga naglakip sa  5 anyos nga batang babaye sa panagsungag sa duha ka motorsiklo didto sa highway sa barangay Jubay lungsod sa Liloan niadtong Lunes sa ala 1:45 sa hapon.

Ang namatay  mao si Nicasio Wagas Yrog-irog, 51 anyos, minyo, ug molupyo sa sitio Fatima, Jubay sa maong lungsod.

Samtang ang duha ka mga pasahero niini nga sila si Maria Vivian Gabito Bugtai, 39, ug ang anak niini nga si Ma. Estifani Gabito Bugtai, 5,   nakaangkon  og mga pangos ug samad sa nagkalainlaing bahin sa kalawasan ug luwas na hinuon sa peligro.

Samtang  si Niño Cañete Alforque, 29,  ulitawo, molupyo sa Poblacion kinsa maoy nagdala sa motorsiklo nga gikabangga sa sakyanan ni Yrog-irog, anaa sa kritikal nga kahimtang sulod sa pribadong tambalanan dinhi sa dakbayan sa Sugbo.

Matud ni PO3 Ramir Maglasang ,traffic investigator sa Liloan Police Station nga  nahinabi sa Banat News  nga gikan sa merkado ang habal- habal nga gimaneho ni Yrog-irog nga nagkarga og pasahero  paingon sa Fatima.

Samtang ang  motorsiklo nga gimaneho ni Alforque gikan usab  sa Danao ug pag-abot sa highway sa maong lugar sa dihang miliko sa walang bahin si Yrog-irog wala kini makabantay sa  motorsiklo ni Alforque nga  kusog usab ang dagan ug didto nahitabo gyud ang pagdinasmagay.

Tungod sa kakusog, nalabay ang mga sakay sa duha ka motorsiklo, lakip ang duha ka drayber niini ug didto motugpa sa semento nga karsada hinungdan nga  nakaangkon sila og dagkong kadaot sa ilang tagsa- tagsa ka  ulo kay nabunal kini sa           karsada.

Daling gitabang sa mga molupyo  ang mga biktima ug gihatod dayon   sa Vicente Sotto Memorial Medical Center (VSMMC) apan namatay gyud   pagkagabii si Irog- irog samtang talandugon ang kahimtang karon ni Alforque.