Anibersaryo sa lalawigan hingpit nang gibuksan

Hingpit nga gibuksan kagahapon sa buntag ang usa ka semana nga kasaulogan sa ika -439th Founding Anniversary sa lalawigan sa Sugbo uban sa mga sakop sa 1st Cebu Ready Reserve Batallion(CRRBn) sa Philippine Army.

Ang  pagsaulog sa lalawigan sa Sugbo pagahimoon sa matag petsa 6 sa bulan sa Agosto sa matag tuig apan ang usa ka semana nga kasaulogan magpadayon hangtod  pa unya sa Agosto 9 .

Si Major Soliver Peras nga maoy batallion  commander sa CRRBN maoy nangulo sa iyang mga sakop nga gihatagan og dakong pag-ila sa kagamhanan  sa lalawigan.

Si Gobernador Gwendolyn Gracia nga opisyal usab sa mga reservist sa Army Reserve Command sa Sugbo maoy nagbukas sa mga kalihokan ug mipadayag sa  kahinangop   ning paghiusa sa mga Sugboanon alang sa dugang pa nga kalamboan.

Si Bise Gobernador Gregorio Sanchez nga nahinabi sa Banat News mipalanog usab og susamang kahinangop sa gobernador.

Nunot sa pagbukas sa usa ka semanang kasaulogan gilusad usab ang nagkalainlaing  indigay nga naglakip sa 4th volleyball governor’s cup, horse show, agri -fair nga gisalmotan sa mga mag-uuma sa lalawigan ug uban pa.

Gilusad usab ang horse show sa dakbayan sa Mandaue nga gisalmotan usab sa mga mahiligong tigsakay  og kabayo nga gipangulohan ni Gobernador Gwen Garcia, Vice Gobernor Greg Sanchez ug uban pa.