Gipaniguro ni Cebu City Planning Officer Nigel Paul Villarete nga lisinsyado sa Philippine Contractors Accreditations Board (PCAB) ang mga kontraktor sa dakbayan.
Ang pasalig sa City Planning Officer iyang giluwatan human usab mopagawas og direktiba ang Department of Interior and Local Government (DILG) alang niini.
Gipahinumduman sa DILG ang tanang lokal nga kagamhanan ilabi na sa mga siyudad ug munisipalidad pag-require sa kontraktor og PCAB license sa dili pa mohatag og business permit.
Kini human usab masayod si DILG secretary Ronaldo Puno nga dunay mga lokal nga kagamhanan nga mohatag gihapon og permit sa kontraktor bisan kung dili PCAB accredited.
Ang pasidaan sa kalihim gipahaom usab sa Akta Republika 4566 nga nag-require sa mga contractors, sub-contractors, ug specialty contractors sa pagkuha og PCAB license.
Tumong niini nga masiguro ang seguridad sa publiko sa pagtrabaho og mga building, vital installations ug ubang infrastructure projects.
Gitataw sa direktiba ni Puno nga mahimong mapasakaan og kasong administratiba ang local chief executive kung dili magpakabana niini.
Wala pay labot sa kaso nga atubangon unya sa mayor kung mapamatud-an nga kini nakalapas sa probisyon nga nalatid sa Akta Republika 4566.