'Kabanay sa batan-ong gi-likidar mihimakak nga kini 'hilabtanon'

Gipanghimakak sa kabanay sa usa sa duha ka mga batan-ong gipatay sa duha ka wala mailhing nagmotorsiklong lalaki diha sa barangay Pardo niadtong milabay'ng Domingo nga “hilabtanon” ang biktima.

Ang uyoan ni John Rey Genosas, 14, nga si Mario Talatayod mihimakak nga ang iyang pag-umangkon usa ka badlungon ug hilabtanon sama sa nanggawas nga balita (dili lang sa Banat News) base sa gitug-an sa kapolisan.

Matud pa ni Talatayod nga way criminal record ang iyang pag-umangkon bisan na sa barangay ug nadamay lang kini. Niadtong tungura nagkuyog ang iyang pag-umangkon ug ni Roel Batuto, 17-anyos kinsa gipusil usab.

Kagahapon gilubong na ang biktima sa sam-ang sa Pardo ug hustisya ang ilang gipanawagan ngadto sa awtoridad.

 Ang pamilya nagtinguhang mosang-at og reklamo ngadto sa Commission on Human Rights aron ma imbestigahan ang mga barangay tanod sa Quiot.

Sila mipasangil nga mga tanod sa Quiot maoy niimbitar sa duha ngadto sa barangay hall apan ilaha nalang nasayran nga gidala diay sila ngadto sa barangay hall sa Basak.

Gipaabot niini nga wala pay alas 12 niadtong  Domingo nananghid ang tanod sa Quiot nga si Cleofe Murello sa mga ginikanan nga imbitaron ang mga bata ngadto sa barangay hall apan gipasagdan kini ug wala gyud kuyogi sa ilang pagpauli.

Nasayran nga ang hepe sa kapulisan sa dakbayan sa Sugbu Sr. Supt. Patrocinio Comendador mipadayag nga ila pang sutaon ang background sa duruha sanglit wala sila magtuong kini may kalambigitan sa gang.

Si Comendador namahayag nga ilang susihon ang pagkatawo sa duha tungod kay duna silay nadawat nga report nga duna sila’y ‘shady activities’ apan wala niya klaroha kung unsa.

Ang mga biktima padulong na unta pauli sakay sa usa ka traysikol apan pag-abot sa eskina sa dalan Sabellano kalit gibabagan sa usa ka motorsiklong may duha ka armadong tawo ug gitagsahan sila og pusil sa ulo.