Giangkon ni Cebu City Councilor Christopher Alix nga lisod sulbaron ang problema sa malnutrisyon sa nasod lakip na dinhi sa dakbayan.
Ang konsehal kinsa maoy tsirman sa komitiba sa panglawas nagkanayon nga ang kalisod sa panahon maoy nakadugang sa maong problema.
“Dili gyud na mapugngan tungod sa kalisod sa panahon ba, mahal na kaayo ang palaliton naglisod nang atong kaigsuonan pagpalit og bugas,” sumala sa konsehal.
Nasayran gikan sa Food and Nutrition Research Institute sa Department of Science and Technology nga duna karo’y kapin sa unom ka milyon ka mga bata sa nasud ang malnourish.
Ug 3.7 milyones niini giingong nagpangedaron og 5-anyos paubos, samtang mokabat usab ngadto sa 2.4 milyones ang nagpangedaron og sayes ngadto sa diyes-anyos.
Matud ni Alix nga nagpadayon ang nutrition program sa siyudad sama sa pagpangpurga ug feeding program sa malnourish nga kabataan.
Apan ang konsehal nga mao usab ang vice chairman sa Cebu City Nutrition Council niingon nga dili mahimo nga matag adlaw kini nilang hungitan.
“Dili man gud pwede nga silang tanan atong pakan-on, makatabang ta nila pero dili sab mahimo nga kanunay nato silang hungitan,”dugang pamahayag ni Alix.
Ang konsehal ang miawhag ngadto sa mga ginikanan nga mahimong pakan-on ang ilang mga anak sa baratong pagkaon apan puno sa nutrisyon.
Kini sama sa mga utanon nga naglakip sa batong, sayote, kalabasa, saluyot, paliya ug uban pa nga dunay Iron, Folate, Zinc, Vitamin A, C ug K.
Gisalikway ni Konsehal Alix ang pagpakaon og mga processed food sa kabataan sama sa mga de lata, instant noodles ug uban pa.
Gawas sa mga utanon gisugyot usab sa konsehal ang pagpakaon sa mga bata og bisan unsang matang sa prutas matag adlaw.
Gihulagway ni Alix ang mga utan ug prutas nga taas og nutritional benefits gawas nga barato kini itandi sa mga processed food.