Usa ka 2-anyos nga batang lalaki nga gioperahan sa iyang bungi atol sa usa ka medical mission sa Bantayan District Hospital sa Bantayan Island ang namatay duha ka adlaw human sa maong operasyon.
Ang ginikanang sila si Daisy ug Jose Allan Sefuesca nga taga Malbago, Madridejos nga na-interview sa DyXR kagahapon sa buntag mitug-an nga niadtong Abril 2 niining tuiga ilang gipa-operahan sa iyang bungi ang ilang kamanghurang anak nga si Judie.
Matud sa inahan nga sa wala pa kini operahi ilang anak gipailawom una kini sa screening niadtong Abril 2 sa buntag ug dihang nakapasar gioperahan dayon pagkahapon.
Apan human sa operasyon ug nianang pagka alas 9 sa gabii gitangtangan na og dextrose ang anak maong nabalaka siya og maayo gumikan kay di pa makakaon ang bata.
Nianang pagka kadlawon sa petsa 3 gihilantan kini ug pagka alas 6 sa buntag gitauran kini og oxygen ug dextrose sa usa sa mga doktor (ngan gipugngan) sa Bantayan District Hospital ug kini gipailawom sa x-ray, gihulagway niyang abtik pa kaayo ang iyang anak nianang mga orasa.
Apan pagkahapon sa sunod adlaw namatay ang iyang anak ug nakurat nalang siya dihang gisekreto siya og pasulod sa usa sa mga lawak sa maong tambalanan nga daw gisirad-an nga sa iyang paminaw dili gusto sa mga opisyales nga dunay laing makadungog sa nahitabo sa iyang anak.
Nianang pagkagabii na sila gitugutang makagawas apan una pa sila hingpit makagawas sa maong tambalanan gikatahong dunay usa sa mga doktor (ngan gipugngan) ang mitunol kanila og P9 mil ug giingnan:
“Kaning 9 mil amo ning tabang ninyo, kun duna man gani mo madunggan mga estorya sa mga tawo, ayaw ninyo paminawa ipalapos lang sa pikas dunggan,” sumala pa sa inahan.
Nahibulong usab sila dihang sa death certificate sakit nga Pneumonia ang gikamatyan sa anak.
Gumikan niini ang magtiayong Sefuesca nidangop ngadto sa Commission on Human Rights aron pagpasaka og kaso batok sa maong mga doktor ug nurses.
Si Dr. Cristina Diango, pangulo sa Integrated Provincial Health Office (IPHO) nga na-interview usab sa samang estasyunan miingon nga iyang ipatawag sa iyang buhatan karung adlaw’ng Biyernes ang mga doktor ug nurse sa maong hospital ug ang magtiayong Sefuesca.
Matud niya wala pay gihimong imbestigasyon ang ilang buhatan kabahin niini gumikan kay wala usab pormal nga mireklamo ang mga Sefuesca diha kanila.
Sa iyang bahin,si Dra. Susana Madarieta sa DOH-7 miingon usab nga wala pa siya makadawat sa maong reklamo.