Nakabsan gyud sa kinabuhi ang 17-anyos nga batan-ong unang gidudahang gitulis ug gikuhaan sa iyang cellphone diha sa Bayanihan Village sa barangay Basak-Pardo niadtong Lunes sa udto.
Ang namatay giilang si Clint Florida, lumad nga taga Bantayan kinsa nagpuyo diha sa iyang iyaan sa nahisgutang dapit kinsa napusilan sa luyong bahin sa ulo ug milapos ang bala sa agtang.
Gisusi karon sa kapolisan ang pagkatawo sa gikatahapan ug nabuhatan na og cartographic sketch sa Pardo Police Station.
Samtang sumala pa sa mga imbestigador sa Homicide Section ang iyaan sa biktima nagkanayon nga walay cellphone ang biktima apan dunay mga testigos nga miingong may cellphone nga gipunit ang tulisan human mahagba si Florida.
Ang tulisan nga nagsuot og kawo yanong milakaw padulong sa main road kon sa national highway.
Nunot sa maong wala magkatukmang pamahayag ipasusi ni Sr. Supt. Patrocinio Comendador ang background sa biktima diha sa Bantayan ingon man ipasubay kung kang kinsang cellphone ang gibitbit niini.
Si Sr. Insp. Aureo Sanchez, hepe sa Pardo Police Station sa pakighinabi kagahapon nagkanayon nga duna na silay ideya kung si kinsa ang mamumuno apan midumili kini sa pagbutyag.
Wala hinuon siya mohatag og dugang detalye kabahin sa kaso sanglit kasamtangan pa nila kini karong gisubay.
Si Florida nakabsan sa iyang kinabuhi diha sa Cebu City Medical Center pasado alas 6 sa gabii niadtong adlaw'ng Lunes human sa kapin unom ka oras nga kini gitabang sa mga doctor.