Dili pa tanang PUJ dunay taripa

Katunga pa lang sa gibanabanang sobra sa 11 mil ka mga PUJ dinhi sa tibuok Central Visayas ilabi na sa Sugbu ang nakakuha og bag-ong taripa aron makapatuman sa giaprobahan nga P8 nga minimum nga plitehan sugod niadtong Lunes.

Si Land Transportation Franchising and Regulatory Board (LTFRB-7) director Romulo Bernardez miangkon nga posibleng dili pa sila makapasalig nga mahuman sulod niining semanaha ang pag-apod apod og taripa sa mga milukat nga operator diha sa ilang buhatan.

Gipasabot sa director nga daghan kaayo ang mga operator og PUJ nga nag-ilogay og lukat sa bag-ong taripa samtang duna lay 18 ang tanang personnel sa ilang buhatan nga maoy nag-atiman pagkakaron.

Hinuon matud ni Bernardez nga sukad kagahapon sa udto 50 porsiyento na ka mga operator og PUJ dinhi sa Central Visayas ang nahatagan na sa bag-ong taripa ug sa maong gidaghanon 60 ngadto sa 70 porsiyento niini ang mga operator sa mga PUJ nga ania magbiyahean sa Sugbu.

Giawhag hinuon niya ang uban pang mga operator nga wala pa makakuha og bag-ong taripa nga mosabot ug dili kaayo mag-apura tungod kay gihimo nila ang tanan mapadali lang ang pag-apod apod niini.

Subli usab nga giklaro sa direktor nga P520 tanan ang mabayran sa molukat og taripa diin ang P510 niini ang filing fee ug ang P10 mao ang legal research fund samtang dugang P50  sa matag sobra sa usa ka unit matag taripa nga lukaton.

Na-obserbahan sa Banat News nga hangtod kagahapon daghan gihapon sa mga PUJ  dinhi sa dakbayan ang pabiling mikolekta og P7  nga minimum nga plitehan tungod kay wala pa sila makalukat og bag-ong taripa.

Partikular na ang mga PUJ sa Banawa Carbon, Guadalupe Colon nga rota, Ayala Colon, Lahug ug Apas-Carbon nga rota ug Labangon Ayala.