Habal-habal sa ‘Lacion nag-rally

Gisupak sa mga habal-habal drayber ang tinguha sa kagamhanan sa lungsod sa Consolacion nga pag-regulate sa ilang pagpamasahero nga apil na niini kun asa sila mopakanaog ug mopasakay og pasahero diha sa terminal.

Kagahapon milusad og rally sa atubangan sa munisipyo sa lungsod ang mga drayber agi’g pagpakita sa ilang pagsupak ug mipadangat sa ilang baruganang hasol kaayo sa ilang habig ug sa mga pasahero ang maong suhestyon sa konseho.

Nangangkon ang mga drayber sa habal-habal nga moabot og usa ka libo ang namasada diha sa maong lungsod nga moabot kutob sa mga silingang mga lungsod sa Consolacion ug Compostela.

Milungtad og pipila ka takna ang pagpahigayon ang rally hangtud nga sila giatubang ni Municipal Administrator Gerson Mareño aron sila pakalmahon.

Sa nasayran, si Mayor Avelino Gungob Sr., nagtinguhang ipa-regulate ang mga habal-habal ug uban pang pasaheroan nga sakyanan sa maong lungsod ang nagplano pinaagi sa pagtukod og terminal alang kanila ug sa mga pasahero.

Kini aron hapsay ug luwas ang mga pasahero ingon man usab sa mga habal-habal drivers.