Nasikop sa mga tanod ang usa ka gwardiya kinsa giingong hubog ug nanghagis nga nagwara-wara sa iyang pusil niadtong Biyernes sa hapon sa barangay Lawaan III, dakbayan sa Talisay.
Ang suspetsado mao si Agustin “Inting” Teves, 41-anyos, nagpuyo sa maong lugar ug gwardiya ubos sa Ken David Security Agency kinsa “off-duty” sa maong hitabo.
Matud pa sa mga polis nga si Teves nasakpan nila ni Richard Rabadon ug Abundio Labitad, mga barangay tanod sa Lawaan III, nga nagwarawara sa iyang armas de fuego hinungdan nga puwerting kuyawa sa mga silingan.
Si Teves giduol nila ni Rabadon ug Labitad aron arestohon apan misuki ug misukol kini sa maong mga tanod.
Maoy hinungdan nga si barangay Kapitan Deliah Ybañez daling mitaho sa kapolisan ug nasakmit gikan kang Teves ang usa ka kalibre .38 nga revolver ug unom ka kabhang sa bala.
Gumikan sa iyang gibuhat pasakaan siyag kaso sa paglapas sa Akta Republika 8294 o balaod nga magsilot sa mosukol ug dili motahod sa mga otoridad.