Gideklarar na sa konseho sa siyudad sa Sugbu ang kinatibuk-ang dakbayan nga ubos sa State of Calamity atol sa special session nga gipahigayon sa City Council kagahapong adlawa.
Kini tungod sa bagyong Frank nga miigo sa siyudad niadtong Hunyo 21 nga mikalas og ubay-ubay nga kinabuhi ilabina dihang nalunod ang M/V Princess of the Stars.
Subay niini ang konseho migahin usab og dul-an sa P6 milyones nga kuhaon gikan sa calamity fund alang sa operation sa action center diha sa Cebu City Sports Complex.
Lakip na niini ang paghatag og financial assistance ngadto sa kabanay sa mga biktima sa nalunod nga barko nga mga molupyo sa dakbayan.
Naukay hinuon sa makadiyot ang sesyon human usab nabanhaw ang panagsungi nila ni Konsehal Gerardo Carillo ug Konsehal Rodrigo Abellanosa.
Si Abellanosa nikwestyon sa P3.6 milyones nga gahin alang sa pagbayad sa mga pagkaon nga gihatag ngadto sa kabanay sa mga biktima diha sa sports complex.
“Makapahingangha nang 46 mil nga pack meals as of sa katapusang bill nga gihatag sa mga caterer, murag daghan ra kaayo,” sumala ni Abellanosa.
Apan si Carillo nahangangha usab sa pagkwestyon ni Abellanosa tungod kay giingong ubos sa komitiba niini ang Department of Social Welfare and Services (DSWS).
“Siya maoy chairman sa Committee on Social Services ubos sa iyang komitiba ang DSWS, siya untay angayan nga mo-oversee sa operation,” matud ni Carillo.
Naaprubahan ra hinuon ang resolusyon nga giduso ni Carillo human usab modapig sa konsehal ang mayoriya sa iyang mga kauban sa konseho.
Nasayran nga sila si Konsehal Abellanosa ug Carillo maoy duha ka konsehal sa BOPK nga giingong interesado mag-kongresista sa habagatang distrito sa siyudad sa 2010 elections.