Patay ang usa ka tawo nga mibisita og lubong sud sa sam-ang sa Gun-ob dakbayan sa Lapulapu human kini miuwang sa away sa mga rugby boys ug mga sakop sa gang sa milabay’ng gabii.
Ang biktima mao si Fred Epogon Jr., 22, residente sa Sapangdako dakbayan sa Sugbu kinsa gikatahong miduaw sa lubong sa iyang paryente sa maong sam-ang niadtong tungura.
Sa imbestigasyon ni PO3 Manolito Abellanosa nasugatan sa biktima ang nagkabanging mga rugby boys ug grupo sa Bloods sa maong dapit hinungdan nga kini mipatunga ug gi-uwang ang duha ka grupo.
Apan ang iyang gihimo nakapasuko hinuon sa mga batan-on ug siya na hinoon ang giatubang ug gitabangan og dunggab hinungdan sa iyang ubay-ubay nga samad nga nahiaguman.
Gidali og dala sa Lapulapu District hospital si Epogon apan gideklarar kini nga dead on arrival samtang ang mga responsable sa maong krimen dali nga nakapahilayo sa maong dapit.
Sa pagresponde sa kapolisan narekober ang usa ka resibo gikan sa LTO nga ilang nakita sa bulsa niini nga nagdala sa iyang pangalan ug kagahapon sa gipahibalo ni SPO2 Rolito Jumao-as sa Banat News nga positibong giila sa usa ka Johnny Amante Epogon nga igsuon niini ang biktima nga si Fred.