Bagyong Frank nakapaalerto sa mga kalungsoran sa Sugbu

Mga lumolupyo sa lungsod sa Liloan ug Consolacion duol sa mga sapa ang giawhag sa pagpangandam alang sa paghiklin kun gikinahanglan gumikan sa bagyong nisulod sa teritoryo sa Sugbu.

Si SPO1 Claudio Castro Jr. sa kapolisan sa Liloan nga nahinabi sa Banat News miingon ang kagamhanan sa maong dakbayan ang padayon usab nga nag-monitor sa kahimtang sa mga sapa sa maong lungsod  nga makaapekto sa mga lumolupyo sa higayon nga moawas ang tubig niini.

Matud pa niya nunot kini sa dautang panahon nga dinala  sa bagyong Frank nga miigo sa amihanang bahin sa lalawigan.

Si Mayor Vincent Duke Frasco nga maoy chairman sa municipal disaster and coordinating council ang mipatawag og panagtigom sa mga sakop alang sa pagahimoon nilang pagpangandam sa paghiklin sa mga lumolupyo kung gikinahanglan.

Si Castro miingon nga ang pipila ka mga barangay sa Liloan nga nahimutang sa kakuyaw sa panahon nga kusog ang pagbunok sa ulan mao ang barangay Cotcot, barangay San Vicente, Yati ug uban pa.

Samtang sa Consolacion maoy higpit nga gi-monitor ang mga lumolupyo sa barangay Yati nga dili palang dugay may lima ka balay ang naanod dihang miawas ang tubig sa Cansaga river.

Ang Cansaga river sa Consolacion maoy nag-uwang sa  managsilingang barangay sa Yati, Liloan ug Yati, Consolacion.

Samtang sa dakbayan sa Sugbu kagahapon mipatawag og emergency meeting ang Cebu City Disaster Coordinating Council ug gituki ang ilang angayang buhaton.

Usa sa gikabalak-an mao ang mga liki sa yuta diha sa barangay Sinsin nga namatikdan pipila na ka semana ang nakalabay hinungdan nga ang mga residente gipabalhin nang daan sa dakbayan sa mas luwas nga lugar.