Hingusgan karong semanaha sa traffic division sa dakbayan sa Talisay ang operasyon batok sa mga tawong makasamok ug makabalda sa dagan sa trapiko sa maong dakbayan.
Si SPO4 Henry Obiso ang mibutyag nga dunay mga operasyong ilusad batok sa mga habal-habal nga molapas sa lugar diin sila gitugotan nga makapundo ug makapasakay og mga pasahero ingon man sa mga sidewalk vendors nga nakabara sa agianan.
Ang traffic division padayon usab sa ilang pagpahigayon og operasyon batok sa mga traysikad nga molugwa diha sa highway.
Si Obiso sa pakighinabi niini sa Banat News kagahapon sa buntag mibutyag nga ang traysikad dili angayang moabot sa mga highways tungod sa peligro sa habig sa mga pasahero, sa drayber ug bisan na niadtong makadasmag kanila.
Ang mga traysikad ang gitugotan lang nga makapundo ug makapasakay og mga pasahero diha sa mga sudlonon nga bahin sa dakbayan.
Matud niini nga sukad sa iyang pag-asumir isip hepe sa traffic division niadtong petsa uno niining buwana sobra na sa 100 ka traysikad ang ilang nasikop apan lukaton usab dayon sa mga tag-iya tungod kay P50 lang ang multa.
Ang dili makabayad sa multa mopahigayon pagserbisyo og usa ka adlaw isip community service.
Sa laing bahin, gibutyag usab ni Obiso nga niining semanaha mopahigayon usab sila og operasyon batok sa mga habal-habal ug sidewalk vendor.