Negosyante gihaylo, nakuhaan og P90 mil

Gisumbong sa kapolisan sa usa ka negosyanteng babaye ang usa ka lalaki nga nagpailang pinanser sa casino tungod sa pagsakiyo sa iyang P90 mil pinaagi sa paghaylo kaniya nga mobubo og negosyo.

Ang babaye nga midangop sa Mabolo Police Station mao si Cathy Santos, 27, lumad nga taga Manila, apan nagpuyo karon sa Salinas Drive Extension, Lahug ning dakbayan.

Gisumbong ni Santos nga maoy misakiyo sa iyang salapi mao ang usa ka Novem Florencio Eduave, 28, lumad nga taga Iligan, apan nagpuyo sa dalan Tudtud, barangay Mabolo, ning dakbayan.

Sa imbestigasyon ni SPO3 Ramilito Jacalan sa Mabolo Police Station,  unang nakuha ni Eduave gikan ni Santos ang balor P50 mil niadtong Disyembre, 2007 pinaagi sa paghaylo sa negosyante nga mobubo og puhonan sa usa ka negosyo.

Nausban kini niadtong Enero 2008 og balor P40 mil hinungdan nga miabot ang tanan og P90 mil.

Si Eduave, sumala pa sa imbestigasyon, mipasalig ni Santos nga motubo og 10 porsiyento matag bulan sukad niadtong Pebrero ang iyang salapi nga gitagana ngadto kaniya, apan sukad sa miaging bulan, wala na mopakita kaniya si Eduave.

Sa dihang gitawagan kini ni Santos, dili na makontak si Eduave.

Kahinunduman, si Eduave na-blotter ug napasakaan na usab kini og kaso human gikatahong nangulata sa Mango Square niadtong Abril 6, 2008, kauban ang usa ka Christopher Paje ug nagpailang NBI confidential agent nga si Jose Maria Cal Jr.

Ang mga reklamante mao silang Dr. Ed Hallar, Emmanuel Amador, Neil Go ug Jose Mari Sato kinsa nangreklamo nga gipangulata nilang Eduave ug Paje.

Si Paje ug usa ka Samuel La Torre gidudahan usab nga kakunsabo ni Eduave sa paghaylo niining mobubo og puhonan sa negosyo.