Mga libro pa korehian

Nanawagan si Cebu City Councilor Arsenio Pacaña sa Department of Education (DepEd) nga patukoron og “Task Force Cebu City” nga langkoban og mga eksperto sa nagkalainlaing  subject.

Kini aron maoy mohiling ug mopahigayon og linain nga review ug mokoriher sa mga libro sa mga tinun-an sa elementarya ug high school.

Gihimo ni Pacaña ang maong plano human masayri nga nagpabilin gihapon ang mga sayop diha sa pipila ka mga libro nga giapud-apod ngadto sa mga tinun-an.

Ang labaw'ng gikasubo ni Konsehal Pacaña kay nagpabilin gihapon ang maong kontrobersiya taliwa sa pagkapagya niini niadtong miaging tuig.

“It is unfortunate that there are allegations and reports that textbooks have remain uncorrected despite the revelation in 2007 by experts,” sumala sa konsehal.

Lakip sa mga libro nga napagya sa miaging tuig nga dunay sipyat sa mga hubad, tumong ug mga han-ay sa gramatika  mao ang English, Filipino, History ug Social Studies.
Nasayran nga ang kagamhanan maoy gisangonan na sa pagsusi   ug pagkoriher sa nahisgutang mga sayop.

Kini sama sa Instructional Materials Council Secretariat (IMCS) ingon man ang National Book Development Board (NBDB).

Tungod niini miingon si  Pacaña nga angayan lang nga dunay independenting grupo nga mohimo ug linain nga pakisusi ug mokoriher sa kwestyunableng mga libro.

Alang kang Pacaña, ang pagtukod og Task Force Cebu City maoy usa ka paagi nga madali ang pagkoriher sa mga libro nga gigamit sa mga tinun-an sa dakbayan.
Sa samang higayon gisuportahan usab sa konsehal ang lakang sa senado pagpahigayon og imbestigasyon labot sa textbook errors.