Lalaki gidunggab sa kainom patay

Namatay ang usa ka batan-ong lalake nga gidunggab sa iyang kainom didto sa sitio Baybayon, barangay Calero, lungsod sa Liloan sa miaging gabii.

Ang biktima mao si Diolan Pantojan Cagang, 18 anyos, ulitawo , taga sitio Baybayon, samtang ang nakadunggab mao si Glenn Lican, 26, ug silingan ra sa biktima.

Si SPO1 Dennis Malinao, imbestigador sa kapolisan sa maong lungsod miingon nga nag-inom ang biktima ug ang suspetsado kauban sa ilang mga higala.

Apan samtang nag-inom sila mitumaw ang lalis ug dihang miinit na pag-ayo ang sininghagay, mikuha og kutsilyo ang suspetsado ug sa way daghang langas gidunggab ang biktima nga nasabak sa dughan.

Gidala sa Eversely Child Sanitarium Hospital ang biktima apan gideklarar kini sa mga doktor nga patay na, samtang misibat usab dayon ang suspetsado nga maoy gipangita karon sa mga kapolisan.