Upat ka tawo ang naangol sa duha ka aksidente sa motorsiklo sa sitio Languyon, barangay Manga lungsod sa Tuburan ug barangay Poblacion sa lungsod sa Barili niadtong Domingo ug adlaw'ng Lunes. Sa lungsod sa Tuburan, nangaangol ang managsuong sila si Carlito Condiman, 19, ug manghod niining si Emilio, 15, pulos taga barangay Mag-antoy, Tuburan dihang nidasmag sa luyo sa Isuzu dumptruck nga gimaneho ni Randy Roble, 34, taga barangay Guinsay siyudad sa Danao.
Matud ni PO1 Roxam Enerio dihang nahinabi sa Banat News nagsunod ang motorsiklo sa duha diha sa trak apan wala na maka-brake dihang mimenor ang trak ug nisampak sa luyo sa maong sakyanan hinungdan sa ilang pagkalamba sa karsada.
Mga pangos ug bali sa tiil ang naangkon sa mga biktima nga gidali pagdala sa Tuburan District Hospital apan luwas na sa peligro.
Sa laing aksidente diha sa Barili, mga bun-og ug pangos sa kalawasan ang nahiaguman nila ni Roberto Mangyao Jr., ug Romeo Gimarangan, 29, human nila gikasungag ang pickup sa usa ka Irish national nga si John Joseph Cliffrod, 40.
Matud ni SPO4 Edward Villaester sa Barili Police dihang nahinabi sa Banat News ni-overtake sa pickup sa usa ka porlon ug sa paghimo niini gisungag hinuon niya ang motorsiklo sa duha.
Ang langyaw mao nay nidala kanila sa Barili District Hospital.