Bisan sa kamanduan ni Pres. Gloria Macapagal-Arroyo ngadto sa mga tunghaan nga walay ipatuman nga pagpa-usbaw sa matrikula, mga 19 ka unibersidad ug kolehiyo sa Sugbo mipahibalo na sa pagpa-usbaw sa matrikula.
Si education supervisor Dante Cabunilas sa Commission on Higher Education (Ched) nagkanayon nga ipatuman ang bag-ong kamanduan gikan sa ilang buhatan pagpa-usbaw sa matrikula karong abli sa klase sa Hunyo.
Sa rekord sa Ched, nag-una ang tunghaan nga Northeastern Cebu Colleges sa Danao nga mopa-usbaw og 16 porsiyento.
Pito usab ka tunghaan ang mopa-usbaw sa matrikula ngadto sa 10 porsiyento. Kini mao ang Cebu Aeronautical School, Cebu Roosevelt Memorial Foundation Inc., St. Louise de Marillac College, University of Southern Philippines, University of the Visayas Main ug Toledo campus.
Ang Cebu Institute of Technology mopa-usbaw og 9 porsiyento sa ilang college of nursing.
Duha ka tunghaan nga mao ang University of San Carlos sa college of nursing ug Asian College of Technology mopa-usbaw og 8 porsiyento.
Ang Univesity of San Jose Recoletos mopa-usbaw usab og 7.5 porsiyento, samtang 7 porsiyento sa St. Theresa’s College, 6 porsiyento sa Cebu Doctor’s University, 5 porsiyento sa Rogationist Seminary College-Cebu Inc., college of nursing sa University of Cebu ug Consolatrix College.
Ang Ama Computer College maoy kinaminusan og gi-usbaw nga 3 porsiyento lamang sa kada yunit.
Si Cabunilas miasoy atol sa 888 forum sa Waterfront Lahug nga dili na mapugngan ang pag-usbaw sa matrikula sa mga tunghaan bisan sa kamanduan ni Pres. Arroyo.
Sumala pa ni Cabunilas nga naaprobahan na ang kamanduan alang sa maong mga tunghaan sa wala pa ang kamanduan ni Arroyo.