Hubog nga gibadlong nga dili magpataka og suka nasuko ug mideretso sa pagpamusil didto sa barangay Langtad, lungsod sa Argao niadtong milabay’ng alas 8:30 sa gabii.
Ang suspek giila sa kapolisan nga si Josephus Zeta, 22, ulitawo ug molupyo sa nahisgutang lugar samtang ang biktima giila nga si Virgilio Remonde, 55, walay klarong trabaho ug molupyo ra usab sa maong lugar.
Matod ni PO1 Eduardo Semilla sa Argao Police Station sa dihang nahinabi sa Banat News subay sa inisyal nga imbestigasyon niini ang biktima nagkaon sa gawas nga bahin sa ilang pinuy-anan niadtong tungora ug kalit lang miagi ang suspek nga hubog.
Dihang naabot na sa duol kalit lang misuka ang suspek tungod sa sobrang kahubog niini apan gibadlong kini sa biktima ug giingnan nga dili magpataka og suka tungod kay law-ay nga paminawon gumikan kay nagkaon siya sa duol niini.
Apan gikasuko kini sa suspek ug mibahad kini nga “bantay kay mobalik ko” dayong sirit og pauli sa ilang balay.
Apan wala magdahom ang biktima nga sa pagbalik niini magdala na kini sa iyang armas nga pugakhang.
Pag-abot niini sa panimalay sa biktima gilabay niini og bato ang atop sa balay sa biktima hinungdan nga napugos og kanaog aron pagsusi kun si kinsa ang nanglabay og bato sa ilang balay.
Matud ni PO1 Semilla nakit-an sa biktima ang suspek nga nagbitbit og pugakhang hinungdan nga gisuwayan unta niya kini pag-ilog apan aksidente nga mibuto ug naigo sa bukton ug kamot ang biktima.
Daling gidala sa tambalanan ang biktima ug luwas na sa peligro samtang ang suspek nadakpan sa mga miresponde nga mga polis ug nagtingkagol na karon sa bilanggoan.