Negosyante kit-ang patay

Inilang negosyante nakit-ang patay na sulod sa lawak sa panimalay sa iyang inahan sa Maria Luisa Estate Park sa Banilad ning dakbayan kagahapon sa buntag.

Si Alfonso Aboitiz, 48, minyo, nga executive vice president sa Aboitiz and Company, nakit-an nga may pinusilan sa tuong bahin sa iyang tampihak ug patay nang nakit-an sa iyang katabang.

Sumala pa sa imbestigasyon ni SPO4 Alex Dacua sa Homicide Section nga ang namatay nakit-ang patay na sa katabang nga si Eusebia Catubay, 31.

Si Catubay daling nanawag sa igsuon ni Alfonso nga si Jimmy aron ipahibalo ang nahitabo.

Ang Emergency Rescue Unit Foundation (ERUF) daling miresponde sa hitabo, apan wala na matabang si Alfonso.

Sa pakisusi sa Scene of the Crime Operation (SOCO), nasuta nga milapos ang bala sa wala pa mahibaw-ing kalibre ngadto sa walang bahin sa ulo ni Alfonso.

Ang mga imbestigador naka-recover og .9mm Pietro Beretta, usa ka slug nga wala na maporma, magazine sa .9mm ug siyam ka buhing bala sa .9mm.

Si Insp. Mario Monilar, hepe sa Homicide Section, nagkanayon nga nagpaabot pa sila sa resulta sa PNP Crime Laboratory aron mahibaw-an ang sirkumstansiya sa pagkamatay sa negosyante.