Nabulabog ang usa ka pamilya diha sa sitio Nangka sa barangay Camputhaw ning siyudad sa Sugbo taliwala sa ilang pagkahinanok sa pagkatulog niadtong miaging kaadlawon.
Kini sa dihang kalit lang mihagba ang konkretong bongbong sa sala ug kusina sa ilang panimalay ug misulod ang daghang yuta.
Ang panimalay nga nabiktima sa landslide gipanag-iya sa usa ka Pedro Ronato, hingkod ang panuigon ug dunay lima ka mga anak.
Nagtuo si Ronato nga ang mga pag-uwan nga nasinati sa dakbayan sa miaging pipila ka mga adlaw maoy nakaingon pagdahili sa yuta kilid sa ilang balay.
Taliwala sa maong hitabo, nakapasalamat lang gihapon si Ronato tungod kay gawas sa mga butang nga nangadaut, walay kinabuhi nga nakalas sa maong insidente.
“Maayo gani kay wala ko makatulog sa sala atol sa hitabo, anha ra ba ko diha tigkatulganan magabii,” sumala ni Ronato.
Ang mga butang nga nangadaut ug nadat-ugan sa midahili nga yuta naglakip sa refrigerator, DVD player, divider, lamesa ug uban pa.
Nangayo na og tabang si Ronato sa barangay aron mahaw-as ang yuta nga midat-og sa ilang sala ug kusina, apan sa paghikay ning balita wala pay miabot sa ilang pinuy- anan.
Nasayran hinuon nga nangayo na og assistance si Camputhaw barangay captain Lorenzo Basamot ngadto sa Cebu City Disaster Coordinating Council (CCDCC).
Nabalaka si Ronato nga magbaha unya ang tubig sa sulod sa ilang pinuy-anan kun mubundak na usab ang kusog nga ulan.
Gawas sa tabang sa CCDCC mangayo usab og financial assistance sa siyudad si Ronato aron mahulipan ang pipila ka butang nga ilang gikinahanglan.
“Mangayo lagi sab ko og tabang ana kay nangaguba na man nang among mga gamit, driver ra gud ko,”dugang pasabot ni Ronato.
Una nang nakasinati og pagdahili sa yuta ang sitio Nangka usab sa barangay Sinsin ning siyudad nga mibulabog sa kapin sa 40 ka mga pamilya.
Ang nahisgutang mga pamilya nga apektado usab sa landslide anaa karon gipabakwit sa sports complex sa barangay Sudlon 1.