Naglaum nga mahuman sulod ning semanaha ang pangu sa kapolisan sa Probinsya sa Sugbu sa gihimo nga imbestigasyon sa kapolisan sa Minglanilla kabahin sa pag-ambush ug pagpusil patay sa gidudahang tulisan nga si Recoly Igoy sa miaging semana diha sa barangay Pakigne.
Kini ang nasayran sa mga tigbalita dihang nahinabi si CPPO director Sr. Supt. Carmelo Valmoria.
Matud ni Valmoria iyang gipaabot kagahapon ang hepe sa Minglanilla Police, Sr. Insp. Romeo Santander nga mobisita sa iyang buhatan nga magdala sa resulta sa imbestigasyon sa maong kaso ingon man ang ipagawas nga cartographic sketch sa mamumuno kang Igoy, ug sa drayber niining si Renalde Enario ug pagkaangol sa asawa nga si Analie ug igsuong babaye nga si Chona.
Gibutyag ni Valmoria nga usa pa lang ka cartographic sketch ang nabuhat ug kini mao ang gunman.
Nipasabot ang maong opisyal nga pre-mature pa kaayo nga moluwat siya og dugang impormasyon tungod kay sa pagkakaron nagpadayon pa ang imbestigasyon sa kaso.
Apan iyang gitataw nga ang ilang imbestigasyon nagsentro gyud nga dako ang posibilidad nga kauban ra ni Igoy ang nipusil patay ingon man ang posibleng hinungdan sa maong kaso.
Si Igoy napusilan niadtong Abril 28 niining bulana samtang napusilan patay ang kaubang tulisan nga si Nelson Gutierez ni SPOI Agadier dihang misuway ug napakyas sila pagtulis sa Rural Bank of Cebu South Inc.