V-hire driver miluwat og pamahayag vs. 4 tulisan

Pormal na nga miluwat sa iyang affidavit diha sa kapolisan sa dakbayan sa Talisay ang drayber sa v-hire batok sa upat ka mga tulisan kinsa duha niini ang napalgang patay na sa milabay'ng semana diha sa sitio Camp 6, barangay Manipis, dakbayan sa Talisay.

Si Leonil Prajes,   taga barangay Camp 7, lungsod sa Minglanilla ang pormal nga miduso sa iyang affidavit kagahapon sa buntag.

Kasong attempted robbery ug damage to property ang gipasakang kaso ni Prajes diha sa Talisay City Prosecutor’s Office batok kang   Felix Sacamay ug usa ka “Jun” kinsa drayber sa habal-habal.

Si Prajes ang miila ug mipasangil sa duha nga kauban nila ni Eleoterio Nacario ug Roger Ocariza kinsa parehong napalgang patay na diha sa barangay Manipis nga buot untang motulis kaniya ug sa iyang mga pasahero.

Base sa affidavit ni Prajes ang nahisgutang pagpanulis nahitabo niadtong Mayo Uno niining tuiga sa alas 9:30 sa gabii diha sa Manipis.

Gibutyag niini kagahapon sa Banat News nga sa wala pa mahitabo ang insidente gikan siya sa Citi-link ug nagbiyahe paingon unta ngadto sa Lutopan.

Apan paghiabot nila sa lugar si Jun ang kalit lang nga mipababag sa motorsiklo diha sa karsada samtang usa sa mga suspetsado ang mition og pusil diha sa bildo nga bintana sa van tumong kaniya ug ang usa usab didto magtion tumong sa iyang mga pasahero.

Si Prajes mipasangil usab nga gipusil sa duha ka suspetsadong tulisan ang atubangan ug likod nga ligid sa walang bahin sa van apan gipadagan niya kini bisan og flat na paingon sa balay ni kapitan Joselito Laurente.

Ang upat ka giingong mga tulisan ang naglumba og panagan dihang ang mga opisyal sa barangay ang miresponde sa maong alarma.

Matud ni Prajes nga milayat ngadto sa bung-aw sila si Ocariza, Nacario ug Sacamay samtang si Jun ang nagpahaguros sa motorsiklo niini pahilayo sa lugar.

Gibutyag usab niini nga uban ni Laurente miadto siya sa mga balay sa maong mga suspetsado sa barangay Bonbon, dakbayan sa Sugbo ug iyaha kining nailhan.

Si Sacamay ang  misurender ngadto sa kapolisan sa dakbayan sa Sugbo apan tungod kay walay mitumaw nga reklamante gibuhian usab kini sa mga polis.

Si Jun ang padayon pa usab nga gipangita karon sa mga polis.