Nalandig sa tambalanan ang usa ka menor de edad human kini dunggaba og ice pick sa duha ka wala mailhing mga lalaki samtang naglakaw paingon na nga mouli, ang biktima ang nakigsinukmagay sa maong mga lalaki sa milabay'ng adlaw sa barangay Lawaan III, dakbayan sa Talisay.
Nakaangkon og samad dinunggaban sa walang lawas ilawom sa iyang bukton si Jayson Paras Cabreros, 17, residente sa lugar ug dali kining gidala ngadto sa Talisay District Hospital.
Base sa imbestigasyon sa mga polis nga si Jayson gikan nagtan-aw og basketball sa sitio Kasagingan, barangay Tabunok ug naglakaw paingon na untang mopauli apan gibabagan kini sa duha ka mga lalaki kinsa mga blonde ang buhok ug nagsul-ob og mga maong nga short pants.
Si Cabreros misukol ngadto sa maong mga lalaki ug nakigsinukmagay kini apan wala makabantay ang biktima nga nadunggaban na diay siya og ice pick.
Human sa maong hitabo ang maong mga nanunggab ang daling mibiya sa lugar paingon ngadto sa sitio Kawatan, Tabunok.
Si Cabreros natahap nga tulis ang tuyo sa maong duha ka mga lalaki.