Tulo ka kahon nga isdang tulingan, usa ka pukot ug motorbanca nga panagatan gidakop ug gisakmit sa kapulisan human masakpi sa akto nga nagpahigayon og ilegal nga pagpangisda sa kadagatan sa Poblacion lungsod sa Oslob Cebu niadtong milabay’ng buntag.
Ang gidakop nga panagatan mao ang usa ka motorbanca nga dunay tatak nga Sto. Niño ug apil sa gidakop ang kapitan niini nga si Nicomedes Arasan, 34, minyo ug taga Tagbilaran City, Bohol.
Apil sa nasikop ang lima ka mga fish workers niini nga sila si Henry Belotando, 31, minyo, taga Tabulong Dawis, Bohol, Eddie Somaylo, 40, minyo, molupyo sa susamang lugar, Paterno Samante, 47, minyo, taga Sungkolan Dawis Bohol, Marvin Bert Amilan, 22, ug Cristopher Estamico, 21 anyos, minyo molupyo gihapon sa susamang lugar.
Ang kapolisan sa Oslob pinangulohan ni SPO1 Allan Teo Kintanar inabagan sa mga sakop sa Bantay Dagat sa maong lungsod maoy nakadiskita sa maong ilegal nga panagatan samtang nagpahigayon kini og patrolya sa kadagatan sa maong lungsod niadtong higayona.
Matud ni SPO1 Narciso Ysao sa Oslob Police Station sa dihang nahinabi sa Banat News gidala sa ilang buhatan ang mga dinakpan apil na ang mga nasakmit nga butang gikan sa ilang posesyon apan paglabay sa pipila ka oras gi-release kini human makabayad og multa nga P9,000.00 ngadto sa Treasurer’s Office sa maong lungsod apan gibaoran nga dili sublion ang ilegal nga pagpanagat sa maong lugar.