Nihulgang inahan ug igsuon dunggabon gidakop sa polis

Anak og negosyante nga giingong nagumon sa ginadiling drugas gipasikop sa kaugalingong inahan human manghasi diha sa ilang tindahan sa corner MJ Cuenco Ave. Jereza St., barangay San Roque ning dakbayan.

Ang gitanggong sa karsel sa Cebu City Police Office giila nga si Ernesto Palanca, 36, nagpuyo sa nahisgutang lugar human nanion ug mihulgang dunggabon ang inahan, igsuon ug mga kawani sa ilang tindahan ginamit ang usa ka cutter niadtong Biyernes sa hapon.

Si Palanca gikatakdang pasakaan og kasong Batas Pambansa Bilang 6 tungod sa nakuhang cutter diha sa iyang bulsa.

Ang akusado nasikop sa hepe sa Homicide Section nga si Mario Monilar nga maoy gipangayoan og tabang sa mga kabanay niini.

Ang inahan sa akusado nga si Carmencita Palanca, 62, nisaysay sa kapulisan nga ang iyang anak makatulo na kahigayon nga nasulod sa rehabilitation gumikan sa pagkagumon niini sa ginadiling drugas.

Basi sa record sa Homicide Section nga nasuta sa Banat News nga gipa-rehab na ang akusado niadtong tuig 2000, 2001, 2003 gumikan sa drogas.

Si Teresita Reyes, usa sa mga kawani sa tindahan nga gipanag-iya sa pamilya Palanca nitug-an sa Banat News nga labing menos sa usa ka adlaw ka upat kini magbalik-balik aron sa pagpangayo’g kwarta ug gituohang gamiton ra pagpalit og ginadiling drogas.

Ang akusado gikuhaan unta’g pamahayag sa Banat News apan nagdumili kini sa pagtubag.