Patay nang nadangat sa Cebu City Medical Center (CCMC) ang usa ka lalaki human madasmagi sa usa ka taxi alas 3:00 sa kaadlawon kagahapon diha sa dalan Legaspi ug P. Burgos St., barangay Sto. Niño ning dakbayan.
Ang namatay mao si Matias Pugoy nga nagpuyo lang usab sa nahisgutang lugar samtang ang nakadasmag niini giila sa mga traffic police nga si Carmelitos Gebrillo, 40 taga Carcar, driver sa Kevin Mitz nga taxi nga nagdala sa plate no #GWW177.
Base sa report sa Traffic Group sa Cebu City Police Office gikatahong kalit lang nilabang ang biktima dihang nadasmagan sa naghaguros nga taxi nga gimaneho ni Gebrillo.
Hinungdan nga sa ka kusog sa impact nalagpot ang biktima ug nakaangkon og grabeng kadaot sa nagkadaiyang parte sa lawas ug namatay pag-abot sa tambalanan.
Ang driver kasamtangan pa karong gitanggong sa karsel sa Traffic Group samtang gihikay pa ang tukmang kaso nga ipasaka batok niini hinuon ang tag-iya sa taxi nga si Marlou Chan matud pa gikatahong andam makigsabot-sabot lang labot sa maong aksidente.