Nagtingkagol karon sa karsel sa Criminal Investigation and Detection Group (CIDG-7) ang usa ka pasahero sa barko human masikop sa mga security guard dihang gipasanginlang nanghilabot og sapatos sa kaubang pasahero.
Ang gitanggong mao si Jonathan Alob, 29, taga barangay Pusok, dakbayan sa Lapulapu human mireklamo ang vice-president mismo sa barko ug nanawag sa CIDG-7 mga alas 6:45 sa buntag kagahapon.
Si Supt. Rex Derilo, hepe sa Special Operation Branch sa CIDG-7 ug mga kaubanan ilang gisugat ang barko mga alas 8 sa buntag nga midunggo diha sa pier 1 gikan sa Iligan City.
Sa ilang gipahigayong imbestigasyon, si Alob nasikop sa security guard sa barko nga si Niel Cabugason human gikawat niini ang Puma nga sapatos nga mokantidad sa P5,500 nga gipanag-iya ni Harold Rojas nga taga Imus, Cavite.
Si Alob nga gipresentar kagahapong adlawa sa buhatan ni Derilo, mihimakak nga iyang gikawat ang maong sapatos. Matud pa niini nga ang babaye nga tupad niya sa teheras iyang gipangutana kun kinsa ang tag-iya sa maong sapatos apan mipadayag nga wala siya makahibalo.
Hinungdan nga iya na lang usab kining gisul-ob sa ingon presentable siyang tan-awon nga moduaw sa iyang anak ug kanhi asawa nga naa sa barangay Pusok, dakbayan sa Lapulapu.
Gitug-an niini nga pito siya ka bulan nga nagtrabaho isip kargador sa kopras didto sa barangay Pekong, lungsod sa Balbang Lanao del Sur human usab sila magkabuwag sa iyang asawa.