John-John ipa-extradite gyud sa PDEA

Ang legal team sa Philippine Drug Enforcement Agency (PDEA) andam mosang-at og extradition proceedings batok ni kanhi Bise Gobernador John Henry Gregory “John-John” Osmeña aron patubagon sa kaso nga gipasaka ngadto sa Department of Justice tungod sa giingong kalambigitan niya sa pagpalusot sa P3.65 bilyones nga pseudo-ephydrene dinhi sa Sugbu pipila ka tuig na ang nakalabay.

Si Atty. Clarence Paul Oaminal  legal consultant sa PDEA-7 nga gikahinabi sa Banat News nagkanayon nga andan na ang  legal team sa pagpa-extradite ni John-John uban sa mga sakop sa Department of Justice kini kun dili gyud kini mopatim-aw sa maong kaso nga tua na sa DOJ-Manila.

Gitataw niini nga ang DOJ wala maglangan sa maong kaso kun dili ang PDEA maoy nakaingon nila human usab ang kanhi director general nga si Alselmo Avenido wala mopasaka sa maong kaso.

Gani giklaro niini nga andam usab siya nga  sangonan sa extradition niini sama sa ilang pagpa-extradite kaniadto ni Calvin Tan diin malampusong nakuha didto sa Hong Kong uban usab sa abag ni Kongresista Antonio Cuenco ug sa mga opisyal sa Department of Foreign Affairs sa Pilipinas.

Apan kining maong lakang mahimo lang kun dili motunga si John-John gumikan kay siya nagtuo nga moatubang gyud dinhi sa Pilipinas ang kanhi  bise gobernador.

Kini tungod kay   ang kanhi bise gobernador  miluwat og affidavit  niadtong Mayo sa miaging tuig isip tubag didto mismo sa Philippine Embassy sa  Estados Unidos sa Amerika.

Samtang subay niini iyang gibutyag nga niadtong milabay'ng tulo ka bulan ning tuiga, ang mga ahente sa kapolisan sa nasud sa Australiya mipasalig nga moanhi sa Sugbu kini kun mahinayon ang hearing sa maong kaso batok kang John-John diin ang mga counterpart niini sa Australiya dugay nang nakonbikto.

Samtang pikas bahin gipanguluhan usab ni  Oaminal niadtong Sabado sa buntag didto mismo sa panimalay ni Kongresista  Antonio Cuenco uban ni  Atty. Jennifer Rosales PDEA-7 direktor ug ni retired General Teofilo Silaga ang paghatag og pasidungog sa 12 ka mga ahente PDEA-7 ingon man sa lima  ka sakop sa Regional Anti-Illegal Drug Special Operation Task Force (RAIDSOT).

Ang maong pasidungog giulohan kini og Congressman Antonio Cuenco Medal of Merit human usab sa ilang malampusong pagsikop ni Atty. Rex Perewperew ug sa mga miyembro sa pamilya niini sa milabay'ng bulan human malambigit sa pagpamaligya'g ginadiling drugas didto sa probinsiya sa Siquijor.