Tanod gidunggab, gipusil tipi

Gidunggab sulod sa pito ka higayun sa tiyan ug dughan ug wala pa matagbaw gipusil sulod sa tulo ka higayun  ang usa ka tanod nga nagpatrolya sa basketball court sa barangay Looc lungsod sa San Remegio   niadtong Martes sa alas 2:00 sa kaadlawon pagkahuman gyud sa gipahigayung koronasyon sa mga kandidata atol sa kapistahan sa maong lugar.

Ang biktima giila sa kapulisan nga si Eliazar Baguio Jimenez, 27, balo ug tanod sa nahisgutang barangay kinsa namatay.

Samtang ang duha ka suspek nga maoy gitumbok nga nitabang og dunggab og pusil sa biktima giila nga sila si Tirzo Mandado,  taga sitio Bangkal barangay Looc ug ang laing suspek nga si Juntie Calapuan, molupyo ra usab sa maong lugar.

Matod ni PO3 Joe Johnnesky Inot sa San Remegio Police Station dihang nahinabi sa Banat News subay sa gihimo niining imbestigasyon ang suspek nga si Mandado maoy unang niduol sa suspek og nidunggab sa tiyan ug dughan  sa biktima.

Dihang natumba kini  ang laing suspek nga si Calapuan maoy niduol ug nitiwas   pinaagi sa pagpusil   tulo ka higayun   sa bukton, hawak  ug abaga.

Ang mga suspek daling nisibat human sa hitabo samtang ang kapulisan padayon pang nihimo og subsub nga operasyon pagsikop niini.

Sa inisyal nga imbistigasyon personal nga panagbangi tali sa mga suspek ug  biktima ang motibo sa krimen nga niresulta sa pagdinumtanay.