Ang paghimong lungsod sa isla sa Olango sa dakbayan sa Lapulapu maoy nakit-an ni Bokal Victor Maambong nga ang lungsod sa Cordova dili mapunta sa siyudad sa Sugbu sumala sa paagi nga tinguha ni Mayor Tomas Osmeña nga mahimo kining bulag nga distrito sa dakbayan.
Ang Cordova ug Consolacion nga maoy orihinal nga ikaunom nga distrito dugangan sa isla sa Olango nga usa na unya ka lungsod sa lalawigan alang sa pagkumpleto isip usa ka distrito.
Si Osmeña sa iyang tinguha nga mahimong annex nga distrito ang lungsod sa Cordova nagtanyag og mga dagkong kalambuan.
Naglakip niini mao ang pagdugang sa gidak-on sa maong isla pinaagi sa pagahimoon nga reclamation area ug ang pagpahimutang og mga international port niini.
Samtang si Gobernador Gwendolyn Garcia kinsa miuyon sa pagdugang og mga distrito sa lalawigan nagtinguha usab sa pagpakigtagbo sa mga mayor sa lalawigan.
Matud pa niya nga angayan nga panagsultian ang tinguha nga pagdugang og distrito aron magkasinabtanay ug magkahiusa sa katumanan niining maong tinguha.
Ang tinguha ni Osmeña nakasinati og mga pagpadayag sa pagsupak sanglit gawas nga taas pa ang pagahimuong proseso nagkinahanglan og plebisito sa mga lumolupyo sa tibuok lalawigan.
Naglakip sa mipadayag sa ilang pagsupak sa maong tinguha mao si Kongresista Antonio Cuenco ug Pablo Garcia ug Pablo John Garcia.
Ang tulo ka mga kongresista sa ilang pamahayag nagpasabot nga dili mahimo ang pag-ipon sa Cordova nga distrito sa dakbayan sa Sugbu tungod kay wala kini magsumpay.
Ang pagsupak ni Cuenco sa maong tinguha ni Mayor Osmeña maoy usa sa mga hinungdan sa gikataho karong dili maayo nilang pagtinagdanay.