Gipaabot na lang ni BID-7 regional director Geronimo Rosas ang pormal nga kamanduan gikan ni BID Commissioner Marcelino Libanan sa iyang pagbiya sa BID 7 sa dili pa matapos ang bulan o sa sunod bulan sa Mayo ning tuiga.
Matud pa ni Rosas nga ang iyang pagbiya sa BID-7 usa kini ka promosyon sa iyang pagserbisyo sa Immigration gumikan kay siya ang ibutang nga BID Director sa Ninoy Aquino International Airport Terminal 2 nga bag-o lang nahuman ug kini full operational na.
Matud pa ni Rosas nga ang iyang pagdumala sa BID-7 sulod na sa unom ka tuig karong umaabot nga Mayo 6.
Gipasigarbo ni Rosas ang dako nilang koleksiyon sa matag tuig diin wala gyud kini moubos sukad sa iyang pagdumala sa maong buhatan.
Bisan pa sa mga isyu nga kanunay nga gibato ngadto kaniya mapasalamaton kini nga padayon gihapon ang suporta sa iyang mga sakop ilabi na sa ilang tagsa-tagsa ka trabaho.
Gipanghimakak ni Rosas nga adunay kalambigitan sa Assistant Prosecutor Mary Ann Castro sa maong pagpabalhin kaniya ngadto sa kaulohan gumikan kay hangtod karon anaa pa sa Ombudsman ang kaso nila ug wala pa kini maresolbar.
Samtang ang posibleng ihulip ni Rosas mao si Reynaldo Almadin nga usa ka presidential staff ni Presidente Gloria Macapagal Arroyo.