Ukay-ukay sinakmit sa CIDG-7 ipabalhin kustodiya

Aron mapapas ang mga pagdudang dunay ‘milagrong’ gipangbuhat ang Criminal Investigation and Detection Group-7 sa mga sinakmit nga ebidensya plano nila karong ipabalhin og kustodiya ang mga “ukay-ukay” nga ilang nasakmit.

Si Supt. Rex Derilo nitug-an sa mga tigbalita nga mananghid sila kang RTC Judge Geraldine Faith Econg nga ibalhin og bonded warehouse kon bodegang kabutangan sa 80 ka banatang ukay-ukay nga ilang nasakmit sa Talisay City niadtong milabay'ng semana.

Kini gumikan sa nigawas nga video footage sa Balitang Bisdak nga gituuhang pagpagawas sa mga ukay-ukay niadtong gabii sa milabay'ng adlaw'ng Domingo diin usa ka trak nga gisundan og Pajero ang nakuha sa footage nga padulong na sa gawas sa Camp Sotero Cabahug.

Wala hinuon maklaro sa footage kung unsay gikarga niini tungod kay gitabunan kini og trapal. Si Derilo pagkadawat sa maong report miimbentaryo dayon sa mga ebidensya ug nasutang wala kini kulang.

Ang maong mga ukay-ukay gisakmit gikan sa usa ka bodega nga giabangan sa usa ka Myrna Solomon nga taga Cagayan de Oro City ug maoy gitumbok nga tag-iya sa maong mga ukay-ukay.

Niadtong Lunes napasakaan na og kaso si Solomon tungod sa paglapas sa RA 4653.