Mga militante di pa makaparehistro kay way form

Walay makuha nga voter’s registration form ang mga militanteng pundok nga gustong magparehistro sa Cebu City Comelec Office karong adlawa.

Kini dili lang kay wala pay porma ang Comelec alang sa pagrehistro, kun dili, wala pa itakda sa nahisgutang ahensya ang continuing registration.

Matud ni Tessie Delgado, election assistant sa Cebu City North District, nga wala pay timailhan nga mapahigayon ang registration sa musunod nga mga buwan.

“Wala pa may registration ron, wala pa mi kahibawo kung kanus-a magsugod, himoan pa gani na og resulusyon ug memorandum sa Comelec en banc,” matod ni Delgado.

Apan miingon hinoon si Delgado nga dunay mga huhungihong nga posibling unya pa sa buwan sa Hulyo o Agosto sugdan ang continuing registration alang sa 2010 elections.

Una nang giawhag ang Comelec sa chairman sa Fisherfolk Development Center (FIDEC), Vince Cinches, nga andamon na ang voter’s registration form.

Kini tungod kay giingong ubay-ubay sa ilang mga sakop ug sa ilang mga kaalyadong grupo ang gitakdang magparehistro karong adlawa sa buhatan sa Cebu City Comelec Office.

Gipadayag ni Cinches ug kaubanan  nga sila mo-insister sa ilang giingon nga katungod nga marehistro, bisan kung wala pa magsugod ang continuing registration.

“Kanang continuing registration dili man na ingon nga kanus-a magsugod kay it’s a whole year round man, naa mi nakuha ana nga probisyon sa balaod,”sumala ni Cinches.

Nasayran nga gusto sa grupo ni Cinches ug kaubanan nga sayong magparehistro aron i-boycott ang mga kandidato nga ilang dudahan nga dili mahigalaon sa kalikupan.

Lakip sa mga grupo nga gikatahong mag-abot sa buhatan sa Comelec karong buntag, mao ang Save Tañon Strait Citizens Movement and Clean Air Youth Alliance.

Ang ilang pagparehistro sa Comelec karong adlawa giingong maoy kabahin sa ilang mga kalihukan pagsaulog sa Earth Day.

Apan gitataw ni Delgado nga ang continuing registration dungan nga ipahigayon sa mga buhatan sa Comelec sa tibuok kapupud-an.

Midugang ang election assistant nga wala pa sila makadawat  og memorandum gikan sa ilang uluhang buhatan alang sa nahisgutang lakang.