Gilauman ni Cebu City Councilor Christopher Alix nga mosaka pa ang gidaghanon sa mga malnourished nga kabataan sa nasud lakip na dinhi sa Sugbu.
Kini kung dili mahatagan og dinaliang solusyon ang giatubang nga krisis sa bugas nga padayong nasinati karon sa mga Pilipino.
Ang konsehal nga maoy chairman sa Committee on Health sa City Council niingon nga ang bugas maoy nag-unang tinubdan sa Carbohydrates nga gikinahanglan sa lawas sa tawo.
“Gikinahanglan man gyud nato ang bugas kay bisag unsaon, kana man gyud ang atong staple food, bisag unsa pay atong kaonon mangita man gyud ta og kan-on,” sumala ni Alix.
Kung dili na unya makapalit og bugas ang katawhan tungod sa padayong pagsaka sa presyo niini, niingon si Alix nga siguradong mamiligro ang kahimtang sa panglawas ilabi na sa kabataan.
Sa susamang kalamboan, nabutang usab sa risgo sa malnutrition ang mga babayeng nagsabak, lakip na niadtong mga bata nga bag-o lang natawo kung dili na regular ang kaon niini.
Matud ni konsehal Alix nga ang malnourished nga bata, dali usab matakboyan sa laing mga sakit nga maghatod niini ngadto na sa kamatayon.
Gipadayag hinoon sa konsehal nga ang kagamhanan sa dakbayan wala magpabaya sa programa niini batok sa malnutrition.
Gani niingon si Alix nga sila wala mag-agad sa krisis sa bugas, tungod kay ang siyudad regular nga mopahigayon og feeding program sa kabataan.
Partikular na niini diha sa mga barangay nga taas og insidente sa malnutrition sama sa barangay T. Padilla, San Roque, Mambaling ug Kalunasan.
Ang Department of Social Welfare and Services (DSWS) maoy gitahasan sa kagamhanan sa dakbayan nga mopatuman sa nahisgutang programa.
Matud ni konsehal Alix nga gigamit na karon sa DSWS ang P2 milyones nga gahin gikan sa calamity fund sa siyudad alang sa pagpakaon sa kabataan.
Nagkanayon si Alix nga dos mil ka mga bata ang ilang target ug kasamtangang nakapahimulos sa feeding program nga gipatuman sa dakbayan.