Hepe sa human resource department sa dakbayan sa Talisay nagpaabot sa idusong reklamo sa usa ka babaye nga mipasangil nga ang iyang cellphone gikuha sa bata-bata ni Mayor Socrates Fernandez.
Si Emily Cabrera sa pakighinabi niini sa Banat News kagahapon mitataw nga nabasahan lang niya sa pamantalaan ang bahin sa insidente kalabot ni Alvin Ybañez giingong nagpailang sidekick sa mayor, midala sa cellphone sa usa ka Lelian Layam.
Apan matud ni Cabrera nga wala moduso og reklamo sa iyang buhatan batok kang Ybañez si Layam.
Si Cabrera nagkanayon nga naghuwat siya nga moduso og reklamo si Layam aron makapahigayon sila og pormal nga imbestigasyon sa maong insidente.
Niadtong petsa 13 niining buwana si Layam, 29, taga Barangay San Roque sa maong dakbayan nagpa-blotter sa kapolisan sa Barangay Poblacion nga matud niya uban sa amiga sa biktima si Ybañez nga mianha sa ilang balay ang mihangyo kini nga mohuwam sa iyang 6330 nga Nokia cellphone niadtong Marso 22 niining tuiga.
Apan gikatahong wala iuli ni Ybañez ang maong cellphone hinungdan nga mitaho ngadto sa mga polis si Layam.
Si Fernandez kagahapon sa pakighinabi niini sa Banat News mihimakak nga sidekick niya si Ybañez ug gitataw niini nga wala kini madestino diha sa iyang buhatan.
Matud sa mayor nga si Ybañez naa madestino sa General Services Office ug dili kini niya staff.