Ang 39-anyos nga mahuyang nga pasyente nga gibugal-bugalan sa mga doktor, nurses ug medical interns sa Vicente Sotto Medical Center samtang gi-operahan sa iyang lubot tungod sa mihuot nga canister sa deodorant, nagduhaduha pagpasaka og kaso batok sa mga kawani sa maong tambalanan.
Apan bisan pa niini, si Ombudsman-Visayas Director Virginia Palanca-Santiago mipahibalo kagahapon nga gimando niya ang pag-docket sa imbestigasyon sa maong insidente base sa mga report sa newspaper.
Samtang ang Integrated Bar of the Philippines mitanyag nga motabang sa pasyente aron pagpangita og laing mga posibleng violations nga gihimo sa VSMMC ug sa mga medical personnel.
Si Atty. Guiller Ceniza nagkanayon nga ang iyang kliyente mopasaka lamang sa kasong civil batok sa mga doktor, nurses, ug medical personnel nga nalambigit sa kontrobersiyal nga operasyon.
Matud pa ni Ceniza nga kun ang iyang kliyente matagbaw sa resulta sa imbestigasyon posibleng dili na kini mosang-at og kaso. Gitug-an niini nga kasong civil lamang ang posibleng mapasaka tungod kay wala silay nakitang kasaypanan sa paghimo sa operasyon.
Sumala pa sa abogado nga ang kalapasan mao lamang ang katungod sa “privacy” sa pasyente. Ang IBP mitanyag nga mangita sa posibleng mga kalapasan nga nahimo sa mga hospital personnel.
Si Dr. Emmanuel Gines, media liaison officer sa VSMMC, nagkanayon nga ang five-man investigating team gipaabot nga mosumiter sa ilang investigation report sulod niining semanaha.
Si Santiago sa Ombudsman nagkanayon nga ang iyang buhatan mo-abag pag-ila sa mga doktor, nurses, ug mga medical interns ug mga kawani sa ospital nga nalambigit sa kontrobersiyal nga operasyon.
Ang operasyon nakuhaan og video ug na-post kini sa sikat nga Youtube nga makita sa tibuok kalibutan.
Sutaon usab sa Ombudsman ang posibleng kasong kriminal ug administratiba sa mga nalambigit niini.
Matud ni Santiago nga buot usab ilhon sa iyang buhatan ang tag-iya sa cellular phone nga mikuha sa footage atol sa operasyon.
Ang Ombudsman, matud niya, hugot nga nakig-alayon sa Professional Regulations Commission ug Department of Health tungod sa posibleng kalapasan nga maglambigit sa ilang hurisdiksiyon.
Ang 39-anyos nga florista mipatim-aw sayo ning semanaha pagreklamo sa pagbugal-bugal kaniya samtang gi-operahan sa canister sa deodorant nga mihuot sa iyang lubot ug mibahad nga mokiha batok sa mga staff sa VSMMC.
Sa footage nga gi-post sa YouTube, madungog ang singgit-singgit ug katawa sa mga medical personnel samtang may gipakita nga canister sa deodorant nga kolor itom nga gituohang gikan sa lubot sa mahuyang.
Ang operasyon gihimo niadtong Enero sa dihang midangop siya sa VSMMC tungod sa deodorant nga gipasok sa lalaking iyang gikahilawas atol sa New Year, apan na-shock ang pasyente nga karon lamang mikatap ang video footage.