Arestado ang manag live-in nga maoy gitumbok nga tigbaligya og mga rugby ug uban pang klaseng solvents nga maoy gamiton sa mga rugby boys human maaktuhi sa mga polis sa Waterfront police station nga nibaligya niini ngadto sa usa ka 12-anyos nga kustomer diha sa dalan Urdaneta ning dakbayan.
Ang gidakop giilang sila si Jose Villarante Pascual, 46, lumad nga taga Subangdaku ug Norma Garcia Anuba, 41, kapuyo niini nga diha magpuyo sa aseras.
Ang duha gidakop sa grupo ni SPO2 Rene Cerna sa Waterfront police station atol nga nitubag ang maong mga polis og trouble alarm diha sa maong dapit apan ilang nasigpatan hinuon ang duha nga mitunol og usa ka plastik nga may sulod nga solvent nga gituuhang ‘toluene’ sa usa ka batan-ong libudsuroy nga lumad nga taga Kinasang-an Pardo.
Nasuta nga ang magtiayon maoy tigbaligya og gi-repack na sa plastik nga mga solvents sa presyo nga P5 matag putos ngadto sa mga batang libudsuroy nga makit-an diha sa kadalanan.
Gawas pa niini nakumpiskar usab sa kapolisan ang 38 ka repacked solvents ug rubber cement nga gikatakdang ilang ipamaligya sa mga bata ug gituohang halin nga P10.