Nitukod og team ang pangulo sa kapolisan sa probinsya sa Sugbu aron maoy motutok sa dinaliang pagkasikop sa tulo ka mga gidudahang tulisan nga nitulis ug nipusil patay sa usa ka varsity player niadtong Biyernes sa gabii diha sa barangay San Vicente lungsod sa Liloan.
Si CPPO Director P/Sr. Supt. Carmelo Valmoria mitug-an sa mga tigbalita nga iyang gimanduan ang Officer in charge sa Liloan Police Station nga si SPO4 Florencio Apuado nga palapdan ang imbestigasyon sa maong hitabo.
Sa pagka karun ang kapolisan sa maong lungsod wala pay natumbok nga suspetsado nga nitulis ug nipusil patay sa biktimang si Lucky Mantuhac Pitogo, 19, usa ka varsity sa UV Green Lancer nga taga San Vicente.
Si Pitogo gihulagway nga maayong moduwa sa duwang basketbol tungod kay niadtong Junior player pa siya nahimo usab siyang most valuable player diha sa UV Baby Lancers.
Matud ni Valmoria nga wala siyay gihatag nga tagal sa naglangkob sa maong team apan iya lang gimandu nga palapdan ang imbestigasyon kabahin sa maong pagtulis ug pagpatay sa biktima.
Una nang gisubay sa kapolisan sa ilang imbestigasyon nga tulis ang motibo sa pagpatay sa biktima sanglit nagdumili kining mihatag sa iyang cellphone sa tulo ka mga tulisan nga nagsakay og motorsiklo niadtong tungora.
Si SPO4 Apuado mitug-an sa mga tigbalita nga “Love tringle” ang ilang gitutukan karun ug ikaduha nalang ang motibo sa pagpanulis apan wala usab isalikway ang kabahin sa iyang pagka basketbolista hinuon layo ra kaayo ang posibilidad niini.
Hinuon nipasabot si Apuado dili mahimong dali-dalion nila ang maong kaso sanglit una nilang tumong mao ang pagpangita sa mga gikatahapan hinuon nagdumili pa sa pagtug-an kung duna na silay nailhan nga suspek.
Hinuon si Valmoria dihang gipangutana sa mga tigbalita kung love triangle ang posibling motibo sa pagpatay igo lang kining miingon “I cannot disclosed, ongoing ang atong investigation”
Niini gimandu ni Valmoria sa kapolisan sa Liloan ug uban pang kalungsoran nga ipadayon ang pagpahigayon og checkpoint adlaw ug gabii aron madakpan kadtong mga tawo nagdala og dili lisensyadong armas ilabi na niadtong mga nagsakay og motorsiklo.
Gimando ni Valmoria sa Liloan nga gamiton ang mga barangay tanod ug mga sakop sa Barangay Intelligence Network (BIN) sa ilang pagpahigayon og pagpatrolya sa mga interior portion sa matag barangay.