Upat ka trabahante ang namatay ug unom ka tawo ang nangaangol human mahugno ang high-rise steel trusses diha sa sulod sa Tsuneishi building sa Industrial Park sa barangay Buanoy, lungsod sa Balamban kagahapon sa hapon.
Ang mga biktima gikatahong dunay gitrabaho sa maong dapit ug nanungtong sa scaffoldings nga puthaw dihang wala damhang natumba kini ug nangahagbong ug ang uban naigo sa mga puthaw diha sa ubos.
“Four people have died and five are injured. They have been taken to private hospitals in Cebu City,” sumala pa sa environmental manager Leo Salubre sa Tsuneishi group dihang nahinabi sa The Freeman.
Giila ang nangamatay mao sila si Arthur Subing-Subing, 30; Rivera Seludono Jr., 46; Israel Torselias, 39 ug usa ka naila lang nga si Dindin Romeo. Samtang ang nangaangol mao sila si Francisco Imedio, 26; Narciso Ruiz, 32; Gerome Tuline, 25; Danilo Capangpangan, 42 ug Ruel Arcillias pulos mga welders.
Sumala pang Salubre ang maong mga trusses, giporma ginamit ang mga steel beams apan sa wala pa matinong hinungdan nipalyar kini ug nahagsa, hinungdan sa pagkatagak sa mga biktima gibana-banang 15 ngadto sa 18 ka metros.
“There was failure and the truss collapsed,” dugang pang Salubre apan kini miklaro nga aksidente ra gyud ang nahitabo ug walay nalapas nga safety measures ang kompaniya sanglit nagsuot sa tanang safety gears ang mga biktima dihang nahitabo ang aksidente.
Apan sa linaing pakighinabi sa The Freeman kang PO2 Ceasar Climaco gibana-banang 30 metros ang gihabugon sa maong istraktura. Gikatahong ilang gihimo ang phase 4 ug skeleton pa kini.
“Kaning upat nagpatong man gud ni sila samtang nag-welding. Samtang nag-welding sila, kalit lang duna’y mitipak hinungdan sa pagkahugno. Ang lima naa man sa ubos, nanga-igo pud sila sa steel,” sumala pang Climaco.
Ang Tsuneishi maoy naghimo og mga barko ug ang Metaphil nga maoy kontraktor maoy nag-unang kompaniya sa nasud sa natad sa civil, industrial facility installation ug steel fabrication.
Matud pang Salubre ang Metaphil maoy manubag sa danyos tungod kay ang mga biktima ilang mga sakop apan moabag gihapon ang Tsuneishi. (Uban sa report gikan sa The Freeman)