Summer job sa CH magsugod na
Mosugod na usab ang kagamhanan sa dakbayan sa Sugbu pagpanawat og mga tinun-an nga patrabahuon diha sa City Hall.
Kini maoy gibutyag ni Konsehal Eduardo Rama, ang chairman sa Committee on Labor and Employment, Livelihood and Manpower Development sa City Council.
Matud sa konsehal nga ang pag-hire og mga tinun-an gipahaum usab sa programa sa siyudad, ang Special Program for the Employment of Students (SPES).
Labing minos 300 ka mga tinun-an ang i-hire sa dakbayan ubos sa nahisgutang programa nga naggikan sa kabus nga mga pamilya.
Nagkanayon si Rama nga ang tumong sa summer job mao ang pagtabang sa mga tinun-an nga makapadayon sa ilang pagtungha.
“Ang ilang madawat unya nga sweldo gikan sa siyudad magamit man nila pagbayad sa enrollment o sa ilang tuition fee sa sunod nga school year,” dugang pamahayag ni Rama.
Gipahibawo usab sa konsehal nga ilang gipalapdan karon ang SPES tungod kay manguha usab sila og mga tinun-an nga utokan.
Kini sama sa mga tinun-an nga anaa sa dean’s list o nigradwar sa high school nga valedictorian o honor student.
- Latest
- Trending
