2 ka priso sa Tabogon nanghupong

Laing duha ka mga piniriso sa Tabogon Police Station didto sa lungsod sa Tabogon   nangasakit  ug  miresulta sa pagpanghupong sa ilang mga nawong  ug kalawasan.

Nasayran nga una nang nalandig sa tambalanan  ug namatay ang piniriso nga si Austropel Andales niadtong  Marso 17 human manghupong nga miresulta sa paglisod niya og ginhawa sulod sa hapit usa ka tuig niyang pagkabilanggo sa maong prisohan.

Karong bag-o gibutyag ni SPO4 Anecito Manluluyo, deputy chief sa Tabogon Police Station nga  ang laing duha ka piniriso nga nasakit  ug nanghupong mao sila si Vicente Gulani nag-atubang og kasong murder  ug usa ka Eduardo Masong nag-atubang og kasong  frustrated homicide ug pulos nabalhog niadtong Agosto  21  ug  26  niadtong milabay'ng tuig.

Matud ni SPO4 Manluluyo mipadala na sila og request sa Department of Social Welfare and Development (DSWD) aron mangayo og tambal alang sa mga piniriso.

Gikonpirmar ni SPO4 Manluluyo ang unang pamahayag sa hepe niini nga si Insp. Wilfredo Geducos nga nagtumbok  sa gamay apan sementado nga prisohan nga maoy hinungdan sa pagpanghupong sa mga piniriso.

Pagkakaron dunay lima ka mga piniriso nga gibalhog karon sa detention cell sa Tabogon nga duna lang untay tulo ngadto sa upat nga kapasidad.

Gidugang ni SPO4 Manluluyo nga matag semana susihon sa rural health doctor sa lungsod Dra. Flordeliza Arrogante ang kahimtang sa mga piniriso apan kutob lang usa kini sa pakisusi  ug pagrekomendar kun angay na bang ipa-admit sa tambalanan tungod kay wala usab silay available nga mga tambal nga magamit.