“Sugat” angayang isipong pista–Dakay

Gisaulog karong adlawa ang Easter Sunday nga giingong mao ang labing dako nga fiesta o kasaulogan sa tibuok Kristohanong Katilingban.

Kini gisugdan kaganihang kaadlawon pinaagi sa pagpahigayon og “Sugat” o ang paghandum sa unang panagtagbo nila ni Birhen Maria ug sa nabanhaw nga si Hesus.

Matud sa tigpamaba sa Archdiocese sa Sugbu nga si Monsenyor Achilles Dakay nga bisan og wala sa Bibliya ang “Sugat,” apan kini gituuhan sibo sa balaang tradisyon.

Nagkanayon si Dakay nga ang “Sugat” maoy pagpasabot sa katawhan nga wala mausab ang pagka-inahan ni Maria ug sa nabanhaw niyang anak nga si Hesus.

Kini giingong nagpakita usab nga ang kagul-anan ni Birhen Maria samtang nagsud-ong sa iyang anak ibabaw sa krus, nailisan og tumang kalipay ug kamaya.

Niingon si Dakay nga ang Easter Sunday mao ang dakong kasaulugan tungod sa pagkabanhaw ni Hesus tulo ka adlaw human mamatay ibabaw sa krus.

Gani nagkanayon si Dakay nga ang Easter Sunday maoy labing sadya nga kasaulugan didto sa ubang kanasuran.

Wala na hinuon mahibulong si Dakay nganong ang mga Pilipino dili ingon niini kamaya ug kasadya sa pagsugat ug pagsaulog sa Easter Sunday.

“Ang ubang nasod wala man goy fiesta, kita kada lihok fiesta, kada eskina fiesta, bisan diha sa basketbolan ug kadalanan fiesta, mao na nga naminusan atong kasaulugan,” sumala ni Dakay.

“Apan bisan og nagbuwag-buwag atong fiesta, ang Easter Sunday dako gihapon ning pistaha nga angayan gyud natong isaulog,”dugang pamahayag pa niini.

Nagkanayon si Dakay nga ang selebrasyon sa Easter Sunday maoy pagsaulog sa pagkabanhaw ni Hesus agi usab og pagtuman sa panagna.

“Katulo gud gitagna si Hesus nga paantuson ug mamatay pero sa ikatulo ka adlaw mabanhaw, kung wala siya mabanhaw, mahimong bakak ang panagna,” matud sa Monsenyor.

Nidugang si Dakay nga ang maong panghitabo nagpakita lang ang gituuhan sa mga kristohanon gibasi sa kamatuuran ug pagmakatinud-anon.