Bargayo magpalansang sa Mantalongon, Dalaguete

Andam na ang pagpalansang ni Gilbert Bargayo, usa ka Waray, didto sa “Little Baguio” sa probinsya sa Sugbo ugma Biyernes Santo.

Sukwahi sa mga nangagi na nga pagpalansang ni Bargayo,   midesider siya nga magpalansang sa usa ka bungtod sa barangay Mantalongon, lungsod sa Dalaguete.

Ang Mantalongon naila sa abundang utanon ug bugnaw nga temperatura, hinungdan nga gideklara kini sa Hunta Probinsyal isip “Little Baguio”.

Matud ni Bargayo, tumong sa iyang pagpalansang ang pag-usa sa kawsa sa pagpanalipod og pagproteher sa kinaiyahan.

“Bag-o ni para nako, maayo ang lugar, putli, makahinulsol gayud ang kinsay mag Estasyon sa Kurus,” matod ni Bargayo.

Ang maong lugar usa ka family estate nga bag-ohay lang gi convert sa tigdumala nga si former diplomat Jose Maria Canton ngadto sa usa ka parke.

Gitawag ang maong lugar og Cristo Rey Mountain Park nga napuno og mga “Norfolk pine trees” nga gidala sa mga langyaw nga mga madre panahon sa mga katsila.

Ang maong lugar adunay “life-size” nga mga estatuwa sa kada estasyon sa kurus nga nagkatag sa kapin duha ka ektarya nga parke.

Magsugod ang “reenactment” sa pagpalansang sa lain nga bungtod diin nahimutang ang mga nangahabilin sa karaan nga monasteryo.

Usa usab nga angay'ng duawon sa mga gusto nga mag “pilgrimage” mao ang Grotto sa Birhen Maria nga anaa usab sa itaas sa bungtod.

“Ang Pasyon sa Mantalongon” matod pa ni Canton, usa sa paagi nga ma “promote” ang Dalaguete, labina ang Mantalongon isip usa ka “tourist destination”.

Daghan pa siya og plano sa parke ug ang Semana Santa maoy pasiuna.

Si Canton nag representar sa pamilya sa mga Almagro nga nakapanag-iya sa kapin 700 ka ektarya sa 900 ka ektarya nga gidak-on sa barangay Mantalongon.

Ang iyaan ni Canton, ang kanhi mayor nga si Conrada Almagro ang nagbuhat sa desenyo sa “Stations of the Cross” nga gigamit lang sa una exclusibo sa mga kabanay.