Luwas ang 99 ka mga pasahero, duha niini mga bata ug laing pito ka mga tripulante sa na-abiriya nga fastcraft M/B Golden Express-2 didto sa kadagatan sa Henensulan, San Francisco isla sa Camotes kagahapon sa alas 7 sa buntag.
Matud ni PO1 Lito Arias, assistant detachment commander sa Poro Coast Guard sa dihang nahinabi sa Banat News alas 6 sa buntag kagahapon migikan ang maong fastcraft sa pantalan sa Poro paingon sa Pier-I dinhi sa dakbayan sa Sugbo.
Apan pagka alas 7 sa buntag nag-overheat ang usa sa duha ka mga makina niini hinungdan nga nangasunog ang wiring ug namatay ang makina niini ug nag-utaw-utaw na lang kini sa dagat.
Na-atol nga dunay laing sakayan ang miagi gikan sa Ouano wharf sa dakbayan sa Mandaue paingon sa isla sa Poro hinungdan nga giguyod niini ang nag-utaw utaw nga fastcraft balik sa pantalan sa Poro.
Gikonpirmar ni PO1 Arias nga alas 9:05 sa buntag naabot og balik sa pantalan sa Poro ang M/B Golden Express-2 nga gipanag-iya sa Golden Bridge Shipping Inc. ug sister ship sa Ocean Jet.
Gipadayag ni PO1 Arias nga pulos luwas ang tanang 99 ka pasahero duha niini mga bata ingon man ang pito ka mga tripulante apil na ang boat captain ug chief mate niini.
Gipaabot na lang sa coast guard ang marine protest alang sa himuong imbistigasyon.