Semana Santa sa Bantayan monitoron

May giandam na nga “augmentation forces” ang kapolisan sa probinsiya  alang sa selebrasyon sa Semana Santa sa isla sa Bantayan.

Mao kini ang gibutyag ni SPOl Felix Escarlan, deputy chief sa Santa Fe Police Station, kinsa nagkanayon nga wala silay kompiyansa basin kun sa grupo sa ilang mga bisitang langyaw may masagol nga mga terorista.

Hinuon matud pa ni Escarlan nga gisabutan na nila pag-ayo ang pagbantay sa palibot kauban ang mga barangay tanod ug ang sakop sa barangay intelligence network (BIN), ingon man ang tag-iya sa mga beach resorts.

Matud pa ni Escarlan nga sa Santa Fe, 17 lamang sila ka polis kauban sa ilang hepe nga si SPO4 Felix Lapera, apan gisaaran na sila ni Sr. Supt.  Carmelo Valmoria direktor sa Cebu Provincial Police Office nga padad-an sila og suportang puwersa ning semanaha.

Ang Santa Fe kauban sa lungsod sa Bantayan ug Madridejos nga naglangkob sa isla sa Bantayan nga magpiyesta sa panahon sa Semana Santa.

Maoy hinungdan nga dugokanan kini sa mga turistang lokal ug langyaw matag tuig, matud pa ni Escarlan.

Gani sugod ning mga adlawa, nagsugod na og pangabot ang mga bisita gikan sa nagkalainlaing lugar nga naghatag usab og kaayuhan sa kinitaan sa mga negosyante sa maong dapit.

Una niini mao ang mga sakyanan sama sa mga lantsa, mga traysikol, traysikad, habalhabal ug may pila ka jeep nga pasaheroan didto sa maong lugar.

Gawas niini ang mga negosyante og pagkaon, ingon man ang mga tag-iya og mga beach resort sa maong lugar ug ingon man kadtong naa sa ubang mga serbisyo sama sa pagpamaligya og tubig ug bisan ang mga tag-iya og poultry ug  piggery nga maoy palitanan sa mga molupyo og baboy ug          manok aron isilbi sa ilang mga bisita..

Ang Santa Fe may gilay-ong 10 kilometros paingon ngadto sa lungsod sa Bantayan ug l5 kilometros usab ang distansiya sa Bantayan ug Madridejos.