Duha ka sakop sa Alpha Kappa Rho (Akrho) nga nagsakay og motorsiklo ang nakigpinusilay sa nagpatrolyang polis ug barangay tanod sa miaging gabii sa sitio Santo Niño sa barangay Jagobiao, dakbayan sa Mandaue.
Ang duha ka Akrho nga nakigpinusilay ang nailhan nga sila si Teresito Reagan alyas Regie Ate Ligan, 26 anyos, minyo, ug Earl Vilan, alyas Panot, hingkod ang panuigon nga pulos taga sitio Calubihan sa barangay Jagobiao.
Ang barangay cop sa Presinto 3 sa Basak Police Station nga si PO3 Carlos Sapanta nga kuyog sa mga barangay tanod sa Jagobiao maoy gikapinusilay sa duha ka suspetsado.
Si PO1 Reynante Joven nga nahinabi sa Banat News miingon nga nagsakay sa multicab sa barangay Jagobiao si PO3 Sapanta kuyog sila si Ruben Golero ug uban pang barangay tanod sa Jagobiao.
Dihang nahidangat sila sa maong dapit ilang nasugatan ang duha nga nagsakay og motorsiklo nga kadudahan kaayo ang mga lihok hinungdan nga ilang gisita apan kalit mipabulhot.
Nahitabo ang ginukdanay hangtud nga mikagar ilang motorsiklo ug nagdali panganaug, dihang giduol ni PO3 Sapanta kalit siyang gipusil sa duha.
Wala hinuon maigo ang mga awtoridad apan ang duha padayon sa ilang pagdagan hangtud hingpit nga nakasibat.
Si PO1 Joven miingon nga ilang pasakaan og kasong frustrated murder ang duha kinsa nagtagotago niining panahona.