Gidemalas og maayo ang usa ka gidudahang tulisan human usa sa mga pasahero sa nasakyan niining jeepney polis diay ug dihang siya mibunot og plamingko ug nideklarar og tulis, nibunot sad ang maong polis og pusil ug nideklarar sad og dakop.
Ang gidemalas mao si Rodel Arsola, 30, residente sa sitio Itom-Yuta sa barangay Lorega-San Miguel ning dakbayan samtang ang nisikop kaniya mao si PO1 Ramon Chenel, nga nadestino sa Criminal Investigation and Intelligence Branch.
Giila usab ni SPO4 Filomeno Guinto ang duha ka mga babayeng tulison unta ni Arsola mao sila si Rena Ramaguera, 21, taga Canduman, Mandaue City ug Rheystell Llanos, 23, nga taga barangay T. Padilla.
Si Chenel padulong na pauli niadtong tungura luwan sa usa ka 13C nga jeepney nga giluwanan usab sa suspek ug pag-abot sa ngitngit nga bahin diha sa dalan New Imus Road sa barangay Day-as kalit kining mibunot og plamingko ug nideklarar og holdap sa duha ka babaye.
Si Chenel nga diha ra usab sa luyo naglingkod apan nakasibilyan og suot nakakita sa gihimo sa suspek mibunot sad dayon sa iyang armas ug mition sa suspek dayong paila nga siya polis ug dakpon niini si Arsola.
Sa pagbunot ni Arsola sa iyang plamingko ug pagdeklarar niini og tulis sa duha ka babaye nakurat ang mga pasahero apan dihang siya say nabunutan og armas ni Chenel ug nipailang polis siya nasad ang nakugang.
Si Arsola gidala diha sa Parian Police Station diin nakuhaan usab kini og usa ka paketeng gidudahang shabu nga giingong diha niya giipit sa garter sa iyang brief lakip na ang plamingko.
Niadtong Huwebes sa hapon, usa ka gidudahang tulisan gihapon ang gidemalas human ang jeep nga iyang gitulis diha sa dalan Archbishop Reyes dunay sakay nga sakop sa Mobile Patrol Group.
Napusilan sa iyang bitiis si Eddie Gabasa, 27, taga barangay Binaliw human kini gukda ug napusilan ni PO1 Remes Goco human niini tulisa si Ann Margarette Noval.