Andam mo-provide og security ang pangulo sa kapolisan sa probinsya sa Sugbu ngadto sa pamilya sa negosyante nga gipusil patay niadtong Domingo sa Poblacion Daanbantayan.
Kini maoy gipahibaw ni CPPO Director Sr. Supt. Carmelo Valmoria nga sa higayon moduol kaniya ang pamilya sa gipusil- patay nga si Renerio “Gogong” Arrogante iya dayong hatagan og mga polis aron masigurong luwas ang nahabiling pamilya sa namatay.
Sa nasayran si Arrogante nakabsan nang daan sa kinabuhi pag-abot sa Daanbantayan District Hospital human siya pusila sa makadaghang higayon gamit ang .45 nga pistola sa nag-inusarang mamumuno samtang nakig-estorya sa asawa ug anak niadtong higayona sulod sa compound sa Mainroad Square nga gipanag-iya sa namatay.
Si Arrogante nidagan pagka konsehal apan napildi niadtong Mayo 14 nga piniliay ubos sa partido sa kaatbang sa politika ni karon Vice mayor Maria Luisa Loot.
Siya usab ang nipasaka og kasong “Bigamy” sa managtiayong Loot sa nagsingabot pa ang piniliay apan nadis-miss ra usab sa korte tungod sa kakulang og merito.
Matud ni Valmoria nga makig-alayon sila sa National Bureau of Investigation (NBI) kinsa ang pamilya sa namatay didto midangop og maoy gusto nga maoy mopahigayon sa maong imbestigasyon.
Hinuon miingon si Valmoria nga humana og himo ang cartographic sketch sa gunman base sa description sa mga testigos apan dili pa nila ikapublikar sa media tungod kay ila pang paaboton ang pamilya ni Arrogante nga mao gyud ang makakita niini.
Matud ni Valmoria bugtong ang mamumuno lang ang nakuhaan og cartographic sketch tungod kay wala na makatimaan ang mga testigos sa hitsura sa driver kinsa nagpaabot sa iyang kauban human pusila si Arrogante.
Gusto si Valmoria nga masulbad sa daling panahon ug mailhan ang mamumuno aron makab-ot ang hustisya sa pamilya ni Arrogante.